#NGECEBRES

Rabu, 18 Mei 2022 00:00
633

#Ngecebres 18 : Pancasila

#Ngecebres18 Pancasila Neng : Imam Arif S (ketua KPU Kab. Banyumas)   Kulonuwun Kepriwe kabare luur? Moga pada sehat waras bregas kabeh ya. Aamiin   Luur, ben tanggal 1 juni kuwe depengeti dadi tanggal laire pancasila. Pancasila sekang tembung panca lan sila. Panca kuwe artine lima, nek sila kuwe artine prinsip. Nemu mangsud, pancasila kuwe lima prinsip. Apa bae lima prinsip kuwe? Lima prinsip ya kuwe ketuhanan yang maha esa, kemanusiaan yang adil dan beradab, persatuan indonesia, kerakyatan yang dipimpin oleh hikmat kebijaksanaan dalam permusyawaratan/perwakilan, dan keadilan sosial bagi seluruh rakyat Indonesia. onine pancasila sing kaya kuwe anane  neng Pembukaan UUD 1945.   Isine Pancasila kuwe asline wis kit biyen banget delakoni, deamalna neng warga indonesia kawit kuna sedurunge bangsa indonesia merdeka. Dadi Pancasila kuwe wis pas karo agama, budaya, peradaban lan ketatanegaraan sing wis tau ana neng bumi nusantara.    Tembung pancasila kuwe pertama disit dewek sing ngucapna kuwe Bung karno, pas sidang BPUPKI 1 juni 1945. Mulane kuwe tanggal 1 juni mau depengeti dadi dina laire Pancasila.   Luur, Pancasila kuwe pirang-pirang fungsi lan perane : 1). Pancasila dadi dasar negara indonesia. mangsude nilai-nilai sing ana neng pancasila kuwe dasar, landasan lan pedoman utama nggo penyelenggaran negara lan  urip bebrayan neng bumi indonesia. Kabeh aturan lan undang-undang penyelenggaraan negara kudu pas karo nilai-nilai pancasila. Ora oleh mbedani. 2) Pancasila uga dadi indeologi bangsa indonesia, mangsude tujuan bareng bangsa indonesia ben urip makmur lan sejahtera kuwe kudu pas lan ngetrapna nilai-nilai pancasila. Nilai-nilai pancasila mau kudu deamalna bareng-bareng neng masyarakat. 3) Pancasila uga dadi falsafah bangsa. Ora olih deganti. Wis dadi harga mati. Ora olih deowah-owah. Mulane pancasila kudu tetep desinauni, dipahami lan deamalna terus-menurus. Ben bisa tetep lestari, ora ana sing wani ngganti. 4). Pancasila uga dadi dasar hukum. Pancasila dadi sumber kabeh aturan lan undang-undang.  5) Pancasila uga dadi pandangan luhur bangsa, mangsude pancasila kuwe kasil sekang rembugane, musyawarahe para priyayi zaman kuna, para pemimpin bangsa awal kemerdekaan biyen kae.   Fungsi lan peran Pancasila liane ya kuwe, Pancasila dadi cita-cita bangsa, uga dadi sumber norma. Pancasila dadi pandang hidup kabeh warga Indonesia, ben indonesia kokoh, kuat sekang ancaman lan gangguan musuh-musuh negara. Kuwe luur, Pancasila kuwe penting banget tumrape bangsa Indonesia. Ningen siki akeh wong ngaku-ngaku paling pancasilais, inyong Indonesia, inyong pancasila.  ningeng nyatane priwe? Nyatane poh, tindakane, polahe ora cocok karo nilai Pancasila. Ngaku Pancasila, ningen esih sok paling kuasa. Ngaku Pancasila, ningen adigang adigung. Ngaku Pancasilais, ningen ora bisa toleransi. Ngaku paling Pancasila, ujung-ujunge anu nggo semena-mena meng lai sing ora pada.   Luur, nek biyen kuwe ngukur utawa nilai wong pas karo pancasila apa ora kuwe gampang ukurane. Gari nyocogna karo butir-butir Pengamalan pancasila. Saben-saben sila neng pancasila uwis ana panjelasane, katrangane. Biyen sedurunge reformasi, cacahe butir-butir pancasila kuwe ana 36 katrangane. nek siki tes reformasi, butir-butir pengamalan pancasila wis dadi 45 cacahe.    Luur, Wektu dewek cilik kae ya luur, dewek ben dina kuwe kon ngapalna butir-butir pedoman penghayatan lan pengamalan pancasila (P4) mau utawa ekaprasetya panca karsa. Nek wis apal, depahami lan deamalna. Kabeh cah sekolah wektu semono sedurunge reformasi mesti apal karo buti-butir pancasila. Uga ana lombane, lomba cerdas cermat p4. Hadiahe lumangyan pisan koh luur. Inyong tau dadi juara, olih hadiahe beasiswa.    P4 kuwe deajarna udu neng sekolahan thok, luur. Neng kampus-kampus, pas ospek uga ana P4. Neng PKK, dasa wisma, RT an uga dewulangna P4. Tes pegawai, perangkat desa gutul pendidikane P4. Ndaftar tni polri, uga ana ujian P4. Gutul dadi kepala daerah uga wajib paham lan ngerti P4. Kabeh wong wektu semono, ora ndeleng statuse apa, nyambut gawene apa,  kabeh dewulang P4. Deajari, kon depahami lan deamalna pancasila kuwe neng masyarakat.   Ningen siki priwe luur?  boro-boro masayrakat umum, cah sekolah lan kuliah wis akeh sing ora apal Pancasila.  apamaning ngerti lan paham butir-butir pengamalan Pancasila. Kae dewek toli sering menangi, wong kena razia masker deukum kon ngapalna Pancasila nyatane ora apal, pathing plintat plintut ngisin-ngisini. Priwe dadi dasar Negara, priwe arep dadi ideologi bangsa, nek apal tok onine kaya apa mbe ora apal, apaming paham lan ngamalna. Lewih nlangsani maning, ana artis neng tv biyen kae, celala celili ora apal Pancasila blass. Mbok wis mringgani pisan.   Lur, priwe arep dadi urip bebrayane akur, guyub rukun, makmur lan sejahtera, nek sing dedakna pedoman hidup ya kuwe Pancasila ora dewulangna neng sekolah lan kampus2? Wingi kae meh bae ana aturan sekang pemerintah sing ora majibna pendidikan Pancasila neng sekolah-sekolah lan kampus-kampus. Nek kaya kiye critane, mbok bisa dadi generasi mudane ora paham pancasila. Mulane dadi merguyokna lan nlangsani pisan, ngorong-ngorong ngaku pancasilais, paling Pancasila, ningen tindak tanduke ora nyermina nilai-nilai Pancasila.    Inyong niteni, tes reformasi, dewek pada kaya alergi meng Pancasila lan P4. Mulane wajar dewek urip bareng bermasyarakat, ningen ora ana sing dadi ugeman,  pedoman. Mulane ananne menang-menangan, kuat-kuatan, ora ana teposeliro lan rasa bebrayane blass. Kabeh egois mikirna awake dewek, kelompoke dewek. Krasa paling bener lan paling kuasa. Nek kaya kiye, siap-siap Indonesia mung gari crita tok kaya negeri Yugoslavia.   Luur, mumpung  mengeti dina lair Pancasila, yuh mulai maning, dewiwiti maning, pada gumregah, semangat goli ngamalna pancasila. Sing dadi pejabat pendidikan, gagean majibna maning pelajaran pancasila neng sekolah-sekolah lan kampus-kampus. Pemerintah gagean gawe program sing kaya P4 ganu kae, mbuh jenegne apa ya terserah njen pada. Sing dadi pejabat, politisi, tokoh masyarakat, tokoh agama lan  tokoh-tokoh liane , kudu gawe conto priwe ngamalna pancasila. Aja pada ngapusi lan korupsi. Sing dadi pembuat undang-undang utawa aturan, uga kudu gawe undang-udang sing bener-bener pas karo nilai pancasila. Sing dadi penengak hukum, uga kudu ngamalna pancasila. Nek kabeh wis gumregah, pada-pada ngamalna pancilsa neng masayratakat, insyaaAllah urip masyarakat Indonesia pada akur, guyub rukun, lan makmur kejibar jibur. Allahuma Aamiin.   Cukup semono bae ya luur, mogaa ana manfangate. Kesuwun ya lurr. Klilan.    

Selengkapnya
Rabu, 11 Mei 2022 00:00
504

#Ngecebres: Refleksi Reformasi

#Ngecebres10 Refleksi Reformasi Neng : Imam Arif S (ketua KPU Kab. Banyumas)   Kulonuwun Kepriwe kabare luur? Moga pada sehat waras bregas kabeh ya. Aamiin   Luur, tanggal 21 mei 1998 biyen kae, pak Soeharto mudun sekang jabatan presiden Indonesia sing wis dejagongi suwene 32 taun. Mudune presiden soeharto wektu semono dearanai reformasi. Dadine pemerintahan tes kuwe dearani pemerintahan era reformasi. Nek zaman sokarno, orde lama. Zaman soeharto, orde baru. Tes soeharto, orde reformasi. Habibi, gusdur, megawati, sby lan jokowi kuwe presiden zaman reformasi. Kaya kuwe lur.    Mudune pak soeharto biyen kae, detanggapi rasa bungah lan syukur warga Indonesia, khususe neng mahasiswa lan rakyat cilik. Mergane impene, penganen angene, tes mudune pak soeharto, ekonomi lan kesejahateraan warga dadi tambah apik. Rega sembako dadi murah lan kejangkau. Golet gawean dadi gampang. Politike tambah maen, politisine kober mikirna rakyate. Korupsi, kolusi lan neportisme ilang. Rakyat lan lsm sing kritis ora wedi maning depenjara. Koran lan media massa ora wedi debredel lan sapiturute. Harapane bisa urip rukun, bebrayan, aman, makmur lan sejahtera.    Ningen kasuyatane piye luur, wis 23 taun reformasi, impen utawa pengen-angen mau ora dadi kasuyatan, malahan dadi blabas saya ora genah. Korupsi  ora suda, malah tambah mambrah-mbarah. Dewek meh ben dina krungu warta, polisi, jaksa utawa kpk nangkapi wong sing korupsi. Wis akeh pisan anggota dewan, kepala daerah lan wong pemerintahan sing ketangkep merga korupsi. Korupsi wis mambrah kawit duwur gutul ngisor. Kawit menteri, anggota DPR RI gutul lurah lan perangkat desa. Ekonomi ora dadi saya apik. Sembako malah regane larang, mundak terus. Sing dadi tani, malah tambah rekasa. Golet gawean uga ora gampang, ana sethithik nggo rebutan wong pirang-pirang. Pkl pada degusur, karyawan akeh sing de PHK. Urip serba sumelang, ora nyaman lan krasa ora aman.   sing dadi mahasiswa, lsm, aktivis ormas utawa wong sing biasane kritis, siki-siki malah ora wani blas. Mergane kejaba deancam  depenjara nganggo UU ITE, uga bisa degruduk neng kelompoke sing ndukung pemerintahan. Wis akeh priyayi sing detangkap, depenjara merga kritisi pembangunan, merga kritik pemerintahan. Ana warta neng lebak banten, jenenge mas badru, upload video wong meteng arep meng dokter ndandak degotong tanggane merga dalane bodol pisan. Ningen mas badru ketiban apes, niate protes merga dalane bodol, neng lurahe delaporna polisi jere pencemaran nama baik. Udu dalane sing dedandani, ningen badru sing detangkep. Nek kaya kiye mbok ora ana wong sing wani protes, kritis utawa kritik pemerintahan, mergane wedi  mbok depenjara, Nek kaya kiye bedane apa karo jamane pak soeharto? Malah lewih parah.   Luur, kahanan sing kaya kuwe mau merkna rakyate pada kesuh lan kecewa meng pemerintah. akeh sing pada ngomong, enak zamane pak soeharto debanding zaman siki. Pirang-pirang gambar neng trek, tembok, balliho, spanduk gambar pak soeharto lan detambahi tulisan enak zamanku to?   Luur, reformasi uga gagal mujudna pemerintahan sing resik, apik lan mikirna nasib rakyate. Pilkada utawa pemilihan kepala daerah kuwe salah sijine anake reformasi, sebabe tuntutane reformasi kuwe pengine kepala daerah (gubernur, bupati/walikota ) kuwe udu tunjukan sekang pemerintah pusat utawa depilih mung neng DPRD thok, ningen depilih langsung neng rakyat. Angen-angene mahasiswa lan inyong rika pada pengin melu milih langsung kuwe, ben nyong rika pada duwe kuasa bebas milih calone, ben deregani  lan deperhatikna neng calon, ben bisa milih calon sing dekenal lan desenengi, lan mengkone calon kuwe dadi pimpinan sing mikirna rakyate. Ningen siki apa nyatane lur? Akeh-akehe pilkada sing ana kuwe urung bisa dadekna pimpinan sing deangen-angen neng rakyate, malahan anane pimpinan sing korup, ora amanah lan ora mikirna rakyate.    Neng era reformasi kiye uga akeh umat beragama sing krasa deanaktirikna, esih ana diskriminatif. Siki akeh golongan utawa kelompok sing ngaku paling kuasa, sing ngaku benere dewek lan nyalahna liane. Uga pada gonthok-gonthokan ngaku benere dewek. Gawe panggonan sembahyang, esih ana bae sing kangelan. Dealang-alangi neng kelompok liane. Umat sing Nglakoni ajaran, uga esih ana kelompok sing krasa sumelang, was-was ora nyaman. Toleransi, tepo seliro kudune wis dadi budaya, malah kasuyatane pada gonthok-gonthokan, menang-menangan.   Kuwe mbok lur, reformasi nyatane gagal. Kabeh sendi kehidupan, kabeh  bagian urip bebrabayan, tambah ruwet, tambak amburadul, tambah ora genah, akeh masalah.     Banjur solusine piye luur, miturute inyong, salah sijine ya kuwe dunia politik lan profesi politik kudu dadi kerjaan sing mulia. Merga dadi kerjaan sing mulia, carane kudu sing mulia. Hasile kudu mulia. Lan nggo urusan sing mulia. Dadi politisi, kepala pemerintahan, anggota dewan, hasil pemilu kuwe mau kerjaan sing mulia, mergane kerjaane mikirna nasib rakyate. Mulane nek dadi kepala daerah utawa anggota dewan, kudu nganggo cara-cara sing mulia, ora perlu wuwur, mitnah, adu domba, gelut, ningen sing kudu delakoni yakuwe dadi contoh utawa tulada neng tengah masayarakat, adu program lan komitmen kerja meng rakyat. Nek wis dadi kepala daerah utawa anggota dewan, kudu nggo mikirna urusan sing mulia ya kuwe priwe carane gawe rakyate bombong, urip nyaman, aman, tenang, makmur lan sejahtera. Mikir lan kerja priwe carane ora ana bocah sing putus sekolah, kesehatane dejamin, golet gawean gampang, cukup sadang pangan lan sapiturute.   Merga dunia politik lan profesi politik mulia, sing dadi rakyat kaya inyong lan rika pada ya golet sing bener-bener kena deandelna nggo mikirna nasibe dewek pad. Golet pemimpin sing bener, kober lan amanh. Carane golet sing wis nyata bisa dadi tulada, wis ana darmane, rekam jejake maen, komitmen meng rakyate, amanah lan professional. Ora milih pemimpin merga duwite, utawa wuwure.    Kudu kabeh mlaku bareng, sing dadi politisi, pemerintah lan rakyat pada-pada duwe kekarepan ndandekna bidang politik lan profesi politik kuwe mulia. Apik lan numani. Aja kaya siki, jere politik kuwe njeleih. Ya dadi njeleih nek sing dadi mung mikir awake dewek, ya dadi njijiih neng milih merga olih wuwur. Yuh bareng-bareng dejajal ngesuk pas pemilu lan pilkada 2024. In syaa Allah dewek pada bisa. Bisa ndadekna politik lan profesi politik sing mulia. Aamiin    Cukup semono bae ya luur, mogaa ana manfangate. Kesuwun ya lurr. Klilan.  

Selengkapnya
Rabu, 04 Mei 2022 00:00
567

#Ngecebres : Pilkada

#Ngecebres16 PILKADA Neng : Imam Arif  Setiadi (Ketua KPU Kab. Banyumas)   Kulanuwun. Priwe kabare lur? Moga sehat, waras, bregas kabeh ya. Aamiin   Luur, ketemu maning ya karo inyong, tukang ngecebres hee. Mumpung esih bada, inyong tukang ngecebres ngaturaken sugeng riyadi luur. Wit ganyong neng duwur sadel, desiram santen. Nek akeh omonge inyong sing gawe mangkel, inyong njaluk pangapunten.   Priwe badane rika lur? Semanger pa ora? Tetep bombong kan? Apa bae kondisine, tetep kudu degawa bombong, kepriwe maning wong lagi ana pendemi. Apa-apa ya esih debatasi. Silaturahmi ya debatasi, lunga-lunga debatasi, plesiran uga debatasi lan sapiturute. Kuwe mau tujuane siji, ben kabeh sehat lan slamet, ora kena virus corona.   Luur, inyong lan rika pada  wis mlebu kerja maning, wis kudu  nyambut gawe maning. Wis cukup preine. Dina pertama mlebu, biasane pada nggo halal bi halal. Nggone inyong ya pada. Esuk-esuk apel, delanjutna halal bihalal karo kabeh kanca sekantor. Halal bihalal kuwe tradisi utawa budaya khas indonesia. artine pada-pada njaluk pangapura, pada-pada aweh ngapura. Nek basa banyumasane ya pur-puran. Ikhlas-ikhlasan, ora duwe dendam maning, ora duwe rasa mangkel maning. Kabeh deikhlasna, kabeh dengapurakna. Posisi kosong-kosong.    Dewek pada wis pur-puran, ibarate kertas kuwe bersih, ora ana coretan apa-apa. Dosa karo kanca batir, wis lebur sebabe wis dengapura. kudune inyong lan rika pada usaha ben priwe carane kertas mau tetep bersih, padane ana coretan ya aja kakehen. Carane ben ajeg bersih kuwe, inyong lan rika pada kudu ngati-ati, njaga lisane, njaga lakune, njaga tindak tanduke, aja ngasi gawe lara, kuciwa utawa cidra meng kanca. Mogaa inyong lan rika pada bisa dadi manungsa sing mulya. Aamiin.   Luur, tes acara halal bihalal neng kantor, nyong labas meng gedung dewan perwakilan rakyat daerah (DPRD) kabupaten banyumas, amrih melu sidang paripurna dewan. Salah sijine agenda sidang, ngrembug cadangan anggaran pilkada 2024. Sinambi nunggu sidang dewiwiti, nyong lan kanca-kanca kpu nemoni anggota dewan, halal bihalal pasrah keluputan. Mbok ana salah lan lupute urip bebrayan njaluk pangapura. Halal bihalal suasane akrab pisan, pada gurisan. Sanajan desambi gurisan, tetep ana rembugane, ya kuwe agenda sindang paripurna cadangan anggaran pilkada 2024.   Ya luur, pilkada banyumas kuwe taun 2024, sanajan bupati siki rampung jabatane september 2023. Pilkadane tetep 2024, bareng sedina karo kabupaten/kota seindonesia, utawa sing dearani pilkada serentak se indonesia. merga jengenge pilkada, miturut aturan perundang-undangan, sing nyiapna anggarane penyelenggaraan mau yakuwe pemerintah daerah. Nek pilkada kabupaten banyumas, sing nyiapna anggara ya kuwe pemerintah kabupaten banyumas. Kaya kuwe luur. Beda karo pemilu, pemilihan umum, anggarane desiapna neng pemerintah pusat.   Pas acara sidang paripurna mau, bupati banyumas ngendika pemerintah kabupaten nyiapna anggaran pilkada kuwe 80 milyar. Merga angarane gede, pemerintah kudu nyimpen disit utawa nyadangna disit, suwene 3 taun anggaran. Taun 2021, pemerintah nyimpen 20 milyar disit. Taun 2022 nyimpen 25 milyar, lan taun 2023 nyimpen 35 milyar. 80 milyar mau kuwe nggo kabeh tahapan penyelenggaraan pilkada sing deanakna neng kpu kabupaten banyumas lan neng bawaslu kabupaten banyumas.  Uga anggaran keamanan  nggo TNI/Polri.    Dadi mengkone dana 80 milyar kuwe debagi, dehibahna meng KPU Banyumas, meng Bawaslu, meng Polresta lan meng Kodim Banyumas. Banjur deenggo nggo kabeh tahapan pilkada. Sekang tahap persiapana yakuwe penyusunan aturan-aturan, perencanaan lan anggaran. Tahap pelaksanan pilkada yakuwe pembentukan PPK, PPS, KPPS; pendaftaran calon, verifikasi calon, kampanye calon, sosialiasi calon, pencoblosan gutul penetapan sapa sing kepilih. Terakhire tahap evaluasi.    Nek neng bawaslu uga ana tahapane, wiwit persiapan, pelaksanaan gutul evaluasi. Kabeh tahapan pilkada sing deanakna neng kpu, kabeh deawasi. Uga ana sing jenenge pembentukan panwascam, petugas pengawas lapangan tingkat desa lan ana pengawas TPS.    Luur, mesti rika gumun ya, deneng danane akeh banget? Ya kayakuwe anane, pilkada lan pemilu kuwe butuh dana sing gede. Mulane dewek pada kudu bener-bener golet lan ndandekna calon sing kober lan idep bener, calon sing peduli meng rakyate, sing amanah ben dana sing detokna mau kuwe ora mubah.    Ningen kaya kiye lur, ora usah sumelang. Kaya pilkada taun 2018 kae,  pilkada kabupaten banyumas ngesuk kuwe bareng karo pilkada gubernur jawa tengah. Dadi akeh sing desingget, akeh pengiritane,  mergane biasane anggaran nggo badan adhock ya kuwe PPK, PPS lan KPPS sing total meh 50 ewu wong kuwe sing nanggung dana propinsi. Jenenge sharing anggaran. Anggaran badan adhok kuwe paling gede lho, kisarane 60% sekang total anggaran.    Luur, kanca-kanca penyelenggara  kpu lan bawaslu mesti gole ngetokna angaran mau nggango prinsip efektif lan efisien. Kaya taun 2018 biyen kae, tes shareing anggaran kabupaten karo propinsi, pemerintah kabupaten banyumas arep aweh anggaran 28 milyar meng kpu banyumas, ningen kpu ngenyang aja kakehen, 22 an milyar bae. Duwit 22an milyar mau deenggo penyelenggaran pilkada, nyatane lewih 5 milyaran. Pilkadane jalan, lancar, duwite esih turah lan debalikna meng kas daerah.   Luur,  tes sidang mau, nyong lan kanca-kanca KPU labas meng Bawaslu. Mergane pas sidang paripurna mau, deneng bawaslu ora deundang. Mulane inyong lan kanca kpu banyumas dolan meng bawaslu niate silaturahmi lan kordinasi. Rembugan bab cadangan angaran pilkada mau. Ben kompak lan klop kabehane. Alhamdulillah kordinasine lancar, guyub rukun, suasane cair karo gentoakan lan desambi maem opor ayam. Nylekamin pisan.   Luur, sepisan maning ya, yuh bareng-bareng mujudna demokrasi sing sehat, pemilu lan pilkada sing bermartabat, golet pemimpin sing kober lan idep bener, sing amanah lan peduli karo wong cilik. Pemimpin sing gawe bombong rakyate, udu mung gawe bombong bandare tok. Carane priwe? Dedeleng rekam jejake, darmane lan inyon rika pada aja gelem nampani wuwur. Nek ana sing wuwur, laporna bae meng bawaslu. Ben kawus.   Cukup semene bae ya luur, ngecebrese inyong. Moga ana manfangate. Sepisan maning mumpung esih bada, nyong njaluk pangapura. Kesuwun  ya luur. Klilan.  

Selengkapnya
Rabu, 27 April 2022 00:00
592

#Ngecebres : Bada

#Ngecebres1 BADA Neng : Imam Arif  Setiadi (Ketua KPU Kab. Banyumas)   Kulanuwun. Priwe kabare lur? Moga sehat, waras, bregas kabeh ya. Aamiin   Luur, sedela maning bada. Kuwajiban puasa sewulan med sedela maning rampung. Rika esih kemutan mbok, wektu esih dadi bocah. Menangi bada senenge ora lumrah, bungah pisan. Bada pada nganggo klambi anyar, maeme kupat opor ayam, jajane pirang-pirang lan akeh wong aweh duwit sholawatan.    Lur, nek wong jawa kaya inyong lan rika pada, bada uga demaknai lebaran, leburan, luberan lan laburan. Lebaran sekang tembung lebar. Tegese wis rampung. Wis rampung gole ngayahi kuwajiban puasa, wis rampung gole tirakat puasa sewulan dur, ora pada bolong. Sewulan dur, inyong lan rika pada puasa, traweh, nderes, lan ibadah lia-liane ben dewek pada dadi manungsa sing apik, lewih taat meng gusti Allah.    Lebaran uga nemu teges leburan, ya kuwe inyong lan rika ketemu kanca batir, ngumpul bareng, pada-pada ngendong lan silaturahmi. Neng kono pada pasrah keluputan, pada ngaku salah kabeh, kabeh pada njaluk pangapura lan aweh pangapura, utawa pur-puran alias kosong-kosong. Ora ana wong sing ngaku bener dewek, kabeh ngaku salah lan njaluk pangapura. Maen banget lah suasanane. Guyub rukun, mlebur dadi sedulur.   Lebaran uga tegese luberan, ya lur. Yakuwe rejekine dewek pada debersihi, carane debagi maring sedulur, tangga teparo utawa kanca batir sing kurang mampu. Dewek pada kon ngetokna sing jenenge zakat fitrah. Zakat fitrah kuwe wajib nggo sapa bae sing urip, awit bayi nembe kloer gutul wong tuwa sing wis buyuten, kami totolen. Lewih maen maning, uga detokna sing jenenge zakat mal, nggo ngresiki  banda dunya inyong lan rika pada ben berkah. Sedekah lan duwit sholawat nggo bocah-bocah cilik ben bungah ya perlu desiapna, rika pada mlaku-mlaku silarutahim karo mbagi-mbagi aweh meng ponakan, plunan, putu, buyut lan bocah cilik liane. Mbok maene poll.    Lur, lebaran uga tegese laburan. Sebabe biasane nek badan utawa lebaran, akeh wong sing ndandani umah ben keton resik, apik, delabur maning ben keton padang. Tujuane nggo ngormati sedulur, kanca batir sing silaturahim. Kejaba umahe sing delabur, dedandani ben ketone apik, uga biasane pada nganggo klambi anyar-anyar. Kadang kadang udu klambi tok sing anyar, giwang, suweng, kalung, kursi, meja lan lian-liane uga deanyari. Kabeh mau kuwe sifate lahiriah. Ningen sing penting kuwe niat ndandani utawa ngayari akhlak lan budi pekerti. Tes puasa sewulan med, ngayari maning, dadi anyar maning, dadi wong sing apik akhlake lan budi pekertine maning ora kecampur sifat lan laku sing ala.   Luur, kejaba lebaran ngemu tembung leburan, luberan lan laburan mau, uga nemu tembung liburan. Mergane pemerintah wis netapna dina bada dadi dina prei, minimal 3 dina prei bareng. Uga bisa demaknai wis libur utawa prei, ora njalanna kewajiban puasa merga wis rampung.   Luur, kahanane bada taun siki esih ajeg kaya taun wingi kae. Esih ana pendemi corona. Mulane inyong lan rika kudu tetep waspada. Njaga bareng-bareng ben corona ora nyebar, lan gagean ilang. Dewek tetep kudu ketat nerapna prokes, protokol kesehatan. Tetep kudu nganggo masker, sering nyuci tangan nganggo sabun, njaga jarak, ngindari kerumunan lan nyuda lelungan.    Luur, wingi kae, inyong lan kanca-kanca neng grup germas, gerakan masayarakat, sowan meng kapolresta, meng dandim lan meng bupati banyumas merga krasa priyatin banget, kit likuran kae, akeh wong sing pada ngelalenna prokes, protokol kesehatan. Neng pasar, neng toko, neng mall-mall pada umpel-umpelan, umpyek-umpyekan pada tuku klambi anyar. Uga tuku nyamikan utawa panganan. Apa maning dina jumat, setu, minggu kae, pada prepegan ningen ngelalenna protocol kesehatan. Neng rumah makan, buka puasa uga ramai banget pada umpyek-umpyekkan. Kayane siki wis pada kendor kabeh gole nerapna protocol kesehatan. Uga neng panggonan ibadah pada bae.    Nek kaya kiye carane, mbok pada bae gawe musibah nggo dewek pada ngesuk ngembene. Bisa merekna virus corona nyebar ora ketulungan, mbabit presasat meng ngendi sing ora. Bisa kaya taun wingi kae, akeh sing pada mlebu rumah sakit lan mati merga kena corona. Na’udzubillah.   Luur, mayuh bareng-bareng manut lan ngetutna himbauan pemerintah. Aja pada gawe krumunan, umpel-umpelan, tetep nerapna protocol kesehatan. Nggo kanca batir sing pada ngrantau, uga taun siki kon sabar maning. Mergane ora olih mudik maning. Ora olih balik ndesa maning. Esih kaya taun wingi. Inyong sanajan wis ora duwe rama biyung, melu ngrasakna lah tangis batine rika pada sing neng perantauan. Pengin ngumpul karo keluarga, pengin sungkem meng rama biyung. Ningen priwe maning, wong delarang pemerintah, wong esih ana corona. Mbok rika pada balik ndesa, niate gawe bungah malahan bisa gawe musibah. Nggawa virus corona, bisa dadi nyilakani wong tuwa.    Luur, sing sabar bae disit, nggo manfangate kabeh ikih. Silaturahime, sungkeme ajeg kaya taun wingi, nganggo virtual bae, nganggo hp bae. Ben slamet kabehane. Oleh-oleh utawa THR depaketna lan detransfer bae hee. In syaa Allah tetep bisa silaturahim, tetep bisa bekti meng wong tuwa.   Mayuh sedulur, pada donga sing kenceng, donga ben corona gagean lunga. Inyong lan rika pada bisa urip sing berkah, rejekine melimpah, bisa ibadah kanthi istiqomah.   Pungkasane atur, inyong mbok gole ngecebres sering kasar, nyindir, nyinggung, nyinyir lan gawe gela rika pada, inyong njaluk pangapura. Inyong lan kanca-kanca KPU Banyumas ngaturaken Sugeng riyadi 1442 H, sedaya lepat nyuwun pangapunten.    Kesuwun ya luur, klilan.     

Selengkapnya
Rabu, 13 April 2022 00:00
150

#Ngecebres : 2024

#Ngecebres 2024 Neng : Imam Arif S (ketua KPU Kab. Banyumas)   Kulonuwun Kepriwe kabare luur? Moga pada sehat waras bregas kabeh ya. Aamiin   Luur, rika ngerti ora, nek taun 2024 ngesuk kae, pemilu lan pilkada bareng? Ngerti  mbok? Pemilihan umum nggo milih presiden/wakil presiden, anggota DPR RI, DPD RI, DPRD Propinsi lan DPRD Kabupaten. Ningen nek Pilkada kuwe nggo milih gubernur/wakil gubernur, bupati/wakil bupati lan wali kota/wakil walikota.    Mesti rika gumun ya, masa setaun pemilihane pirang-pirang? Apa ora gawe bingung nggo wong kaya dewek, wong cilik. Njur rika mesti kepikiran, priwe mumet lan ruwete penyelenggaraane. Sing milih uga bingung, sing dadi kpps neng TPS puyeng mergane ruwet lan ana pirang-pirang wernane surat suarane. Rika uga mesti arep ngomong, apa ora mikir ya sing wong gede neng Jakarta kae, wong wingi sing pemilu limang surat suara, limang coblosan mbe akeh petugas neng TPS sing pada lara lan seda. Luur, inyong ora nyalahna penemu rika pada, nek krungune mung 2024 pemilu pilkada bareng, Mesti kepikirane kaya mau kuwe. nyoblose pirang-pirang, sing arep nyonlos bingung, petugas tps mumet lan repot pisan. Uga sumelang mbok kedadeane kaya taun 2019 nding wingi kae, petugase akeh sing pada lara lan seda.    Luur, in syaa Allah apa sing dadi penemune rika, sumelange rika, lagi degawekna solusine. Ben ora kedadenane kaya taun 2019 wingi kae. 2024 ngesuk kae pancen pemilu lan pilkada bareng taune, pada-pada taun 2024. Ningen beda wulane luur. Beda tanggal coblosane. Awal wulan kiye, DPR karo KPU, Bawaslu lan DKPP wis njagong bareng, rembugan bareng, nentukna dina lan tanggal coblosane, uga nentukna lia-liane.   Luur, kasile rembugan mau kuwe, salah sijine desepakati tanggal coblosane pemilu kuwe tanggal 28 Februari 2024 lan coblosane pilkada kuwe neng tanggal 27 Nopember 2024. Kuwe mbok luur, tanggal lan wulane beda. Merga tanggal 28 Februari 2024 jebule bareng karo dina riaya Galungan, ya kuwe riayane umat Hindu, dadine tanggal coblosan pemilu kuwe urung genah maning, nunggu rembugan maning. Poma dipoma derembug maning, mesti wektu coblosane pemilu lan pilkada beda.    Kasil rembugan liane ya kuwe nyepakati dene tahapan pemilu sing biasane 20 wulan, siki detambahi dadi 25 wulan. Mergane apa? Ben pemilu lan pilkadane lancar. Mergane apa? Pemilu lan pilkada kan bareng setaun, nembe pertama lan nembe tau arep ana. Lan sing genah mesti ruwete lewih sekang pemilu 2019.    Mulane butuh persiyapan sing mateng, sing dawa lan cermat. Ben ora ana maning kedadean-kedadean sing kaya taun 2019, salah sijine yakuwe petugas tps pada ambruk lara lan ana sing seda. Nek wektu persiyapan dawa, penyelenggara uga bisa nyiapna lewih mateng, lewih cermat ben pemilune lancar lan maen.   Luur, sing dadi masalah maning kuwe, penyelenggara pemilune, ya kuwe anggota kpu lan bawaslu propinsi lan kabupaten/kota rampung tugase akhir taun 2023 lan taun 2024. Nek umume, kudu ana seleksi maning nggo ngisi anggota kpu/bawaslu sing wis rampung tugese utawa wis paripurna. Merga pemilu lan pilkada 2024 kae bareng setaun, ana penemu utawa usulan kang KPU RI, yakuwe penyelenggara pemilu siki sing esih ana detambahi masa jabatane. Ora usah ana seleksi maning. Detambahi gutul taun 2025, ngepasi kabeh tahapan pemilu lan pilkada rampung kabeh. Kejaba nggo ngirit biaya seleksine sing atusan milyar kae, uga ora ana jaminan, anggota kpu/bawaslu kasil seleksi anyar mau duwe pengalaman, kemampuan lan keahlian ngurusi pemilu. Mending nambahi wektu jabatane anggota kpu/bawaslu sing wis ana, sing wis genah duwe pengalaman ngurusi pemilu taun 2019 lan pilkada 2020. Ningen penemu kiye urung ana keputusane sekang DPR lan pemerintah.   Luur, rembugan neng DPR kae uga wis mutusna, dene sing dadi patokan nggo nyalonna kepala daerah neng pilkada 2024, ya kuwe kasil pemilu 2024, udu kasil pemilu 2019. Pilkada 2024 kuwe bareng sedina bregg, se Indonesia, kabeh propinsi, kabupaten lan kota nganakna pemilihan gubernur/wakil gubernu, bupati wakil bupati lan wali kota wakil walikota. Pilkada serentak se Indonesia uga iki nembe pertama. Taun-taun sedurunge ora tau ana. Kuwe uga butuh persiyapan sing ekstra lan cermat. Mulane neng banyumas, wis mulai rembugan werna-werna salah sijine nyiapna anggaran nggo pilkada 2024. Anggaran mau kuwe nggo kabeh tahapan pilkada, mengko bentuke dadi dana hibah meng KPU banyumas, meng bawaslu banyumas lan dana pengamangan sing hibahe meng tni polri. Rembugan cadangan dana pilkada wis kopang kaping deanakna. Ben anggaran sing mengkone deenggo pilkada kuwe cukup, ora kurang uga ora turah-turah. Pilkadane lancar. Prinsip efektif efisen.   Luur, ngomong babagan pilkada, neng banyumas kuwe bupati lan bupatine rampung jabatane utawa basa kerene AMJ ne kuwe september 2023. Dene pilkadane nopember 2024. Dadi neng banyumas kuwe ora ana incumbent utawa petahana. Ya kuwe calon kepala daerah sing esih njabat dadi kepala daerah. Merga ora ana petahana, kudune lewih akeh bakal calon sing wani maju, kudune akeh sing wani njago. Kabeh calon pangkate pada, ora perlu ana curiga birokrasi ora netral. Ora bakalan ana politisasi birokrasi, beda nek sing maju kuwe petahana. Mulane rika pada kudu gagean miwiti nggolet tokoh sing kira-kira kewes, pantes lan bisa nggo brayan urip. Sing gelem gawe bombong kawula alit.   Ana pirang-pirang cara gole nggolet calon, salah sijine karo polling. Kawit wulan wingi kae luur, pathing sliweran polling utawa survey, tokoh-tokoh sapa bae sing pantes lan dejagokna kon maju pilkada. Pollinge esih sederhana pisan, ningen wis gawe geger lan gubes. Ana sing nyikapi polling kuwe serius banget, jerene marwah utawa harga diri. Ana uga sing nyikapine santai, jerene kadar nggo dolanan ikih. Mbuh kuwe poling model apa bae, niate mesti nggo tes ombak. Maksude nggo ngukur sapa sing duwe hasrat lan dukungane ana apa ora. Mung inyong njaluk tulung meng rika pada, nek ana polang poling kuwe, rika pada ngisi sing aso. Ra sah spaneng. Kadar esih mandan dawa ikih wektu pilkadane.    Nggo sing niat njago, uga anane poling kuwe desikapi karo sabar lan slow bae. Kasile apa, rika  ra sah pecaca pecucu. Malah mbok kebeneren kena nggo evaluasi, detata maning stategine. Ra sah pada gubes, ra sah pada pecaca pecucu, kabeh dewek seduluran. Mbok kaya kuwe kan lur? Beda pendapat olih, beda pilihan kena, sing utama guyub rukun kudu dejaga.   Wis kaya kiye disit ya luur, cukup semene bae ya. Moga ana manfangate. Kesuwun. Klilan.  

Selengkapnya
Rabu, 06 April 2022 00:00
525

#Ngecebres : Ngelmu

#ngecebres14 NGELMU Kulanuwun, priwe kabare luuur, moga sehat waras bregas kabeh ya. Aaminn   Luur, priwe puasane rika pada? Mbok lancar lan tutug gutul wektune. Moga puasane, trawehe, nderese, sedekahe lan ibadah lia-liaen dewek pada detampa neng gusti Alloh. Allohumma Aamiin   Luur, saben tanggal 2 mei, dewek pada mengeti Hari Pendidikan Nasional. Ningen mengeti hari pendidikan taun kiye inyong krasa priyatin meng nasibe bocah-bocah pada. Priyatin tur sumelang. Priwe  ngemben nasibe bocah lan nasibe negarane dewek. Mergane bocah-bocah wis lewih kang setaun sekolah mung neng ngarep hp utawa ngarep laptop. Pendidikan sing kudune aweh kaweruh utawa ilmu pengetahuan lan nilai moral kebejikan, setaun lewih mau anane mung aweh kaweruh tok. Kuwe uga ora maksimal.    Pak guru lan bu guru aweh kaweruh nganggo video utawa tulisan, murid-muride mau sinau dewek. nek begja ya wong tuwane melu ngancani. Pak guru lan bu guru ora bisa transfer nilai moral lan kebejikan. Sebabe ketemune neng wa, youtube utawa zoom meeting tok. Neng umah bocah lan wong tuwane anane rebut dewek, reang dewek. Ora sida sinau, malah padu karo wong tuwane. Wong tuwane hawane kesuh lan uring-uringan merga kon marahi bocah, deweke uga akeh gawean.   Bocah-bocah sekolahe mbuh dadi apa, neng ngarep hp utawa laptop segeleme dewek. Ora ana unggah ungguhe kaya nek lagi neng sekolahan kae. Malahan akeh-akehe tes absen, banjur lunga dolan utawa game-gamean. Tangi turu sewayah-wayah, segeleme dewek. Merga ora ana kewajiban nek sekolah ngarep laptop utawa hp mau kudu adus disit, dandan disit utawa ngango seragam. Jian bener-bener merdeka belajar, bebas sinau, sinau bebas, sinau ya kena ora ya kena ndean kaya kuwe mbok neng pikirane bocah-bocah. Bisa dibuktikna lah, nek pas ujian utawa tes, bocah-bocah garape mung takon neng google tok, jere kadar ora ana sing ngawasi ikih.   Luur, rika mesti ngrasakna lah ya, dewek pada kudu nukokna hp lan kuota mergane bocah kon bisa sekolah, ningen malah dadi penyakit tok. Sekolah neng ngarep hp mung pirang menit tok, selewihe pada game-gamean sedina met, ora ngerti wektu. Malahan ana sing gim-gimane gutul esuk. Kelalen wektu sholat, deprintah wong tuwa anane mringsung. Jian priyatin pisan.   Nek kahanane kaya kiye bae, priwe nasibe bocah-bocaha ya? Sinaune segeleme dewek, nilai moral kebajikan anane nemu neng dalan, kasil dolan. Kaweruhe sing detrima ya ora maksimal, nilai moral kebejikan kapiran. Mbok yao gagean sekolahe debuka, sekolahe normal maning. Wong pasar, mall, panggonan plesiran, hajatan wis deolihna, kiye sinau neng sekolah malah esih dilarang. Nek kaya kiye bae mbok melasi banget nasibe bocahe dewek? Nek bocahe dewek pada kawruhe pas-pasan, nilai moral kebecikane kapiran, apa ora melasi ngembene nasib negarane dewek? Mogaa sumelange inyong lan rika pada ora kewujud ya. Nangudzubillah.   Luur, golet kawruh utawa ilmu pengetahuan nek neng jawa jenenge ngelmu.  Ngelmu  kuwe kelakone kanthi laku. Tegese wong golet ngelmu kuwe kudu kanthi usaha, delakoni temenanan, lan ngadohi sipat ala ben bisa kasil. Ngelmu utawa nggolet kawruh kuwe wajib ukume wiwit lair gutul nganti setekane umur utawa mati. Merga ngelmu kuwe pancen perlu banget. Coba debayangna, nek wong urip ora duwe sangu kawruh, kaya wong neng tengah segara ora duwe kompas,  bisane mung thingak thinguk bingung arep mareng ngendi ora duwe tujuan.   Luur, golet ngelmu kecaba kudu temenan, uga kudu akeh pengurbanan. Jere jer basuki mawa beya. Kudu ngetokna duwit, tenaga, wektu lan lia-liane. ora gampang kaya malik epek-epek tangan. Kandhane Bung Karno, kristalisasi kringet, uga dilakoni kanthi iklas lan jembar dhadhane kaya segara.   Luur, ngelmu kuwe uga  bisa nudhuna nasibe wong. Karo ngelmu, wong bisa olih gaweyan, banjur olih dhuwit sing bisa nyucukupi kabutuhan kulawarga. Ngelmu uga merekna dadi pangaji lan pakurmatan. Saya dhuwur ngelmune, mesthi uga dhuwur pakurmatane. Deleng wae BJ Habibie, sapa sing ora gumun lan urmat karo kapinterane gawe montor mabur. Lan sepiturute.   Luur, sing penting maning, pendhidhikan kuwe udu mung sing sifate formal tok neng sekolah-sekolah kae. Pendhidhikan watak uga prelu banget, dewiwiti neng umah, neng kulawarga. Bapa-biyung kudu dadi conto kanggo anak-puthune. Nyonthoni babagan ngelmu sipat-sipat sosial lan kabecikan. Siki tholi dewek sering krungu brita, ora sethithik pejabat, pulitikus, pengusaha lan lia-liane padha diukum gara-gara dadi wong pinter ningen senengi minteri. duwe kapinteran ningen ora dibarengi sipat-sipat kabecikan. Ilmune ora migunani kanggo kabecikan meng awake dhewe lan masarakat, ningen malah kanggo sangu tumindak culika, nyolong utawa korupsi.    Mulane ya luur, pendhidhikan kuwe sejatine ora mung babagan ngisi sirah thok, ningen uga ati sing deisi sipat-sipat kabecikan, preduli marang sepadhane, ora duwe sipat srakah lan seneng-seneng sing kurang migunani.   Luur, nek kanggo wong banyumasan, bisa njikot kang falsafahe kudi. Gamane lan simbole wong asli banyumas. Kudi kuwe tegese kudu ngudi, ya kuwe kudu ngudi kawruh. Kudhu seneng ggolet ngelmu, ora gampang marem karo ilmune. golet ngelmu kuwe guthul pati. Mergane Bandha donya, dhuwit sakgepok tetep bisa enthong pronthong utawa ilang. Ningen ngelmu dadi barang kang ora bakal bisa ilang selawase. Migunane nggo dewek lan sekabehane. Mbok kaya kuwe?   Mogaa anak putune dewek dadi wong sing pinter lan bener ya lur. Bocah pinter sing duwe sipat kebecikan kanggo dewek lan masayarakat. Sing bisa gawe mongkog wong tuwane. Aamiin   Cukup semene bae ya luur, moga ana manfangate. Kesuwun ya luur. Klilan.  

Selengkapnya